శివ సంకల్పమస్తు

ఈ మాట పలుకుతూ జన సంద్రం నల్లమల అడవుల్లో దేవదేవుని దివ్యదర్శనానికై కదిలింది.  మండే ఎండలు కూడా లెక్కచెయ్యకుండా అడవంతా హరహర నామస్మరణతో పులకించింది. ఈ మహా యజ్ఞంలో మేముకూడా సమిధలు అవడం మహదభ్గాగ్యం కదూ... అసలు ఈ యాత్ర ప్రారంభమే ఒక అద్భుతం. చిలుకూరు బాలాజీ దర్శనంతో ప్రారంభించడం వల్ల సర్వం శుభప్రదమే కదా. సాయంత్రం వెళ్ళడంతో భక్తజనం తక్కువగా ఉండి చక్కటి దర్శనం ఎక్కువసేపు చేసుకున్నాం. స్వామి పక్కనున్న శ్రీదేవి భూదేవి కూడా కన్నులవిందుగా కనిపించారు. శ్రీరాముడు శ్రీశైలం ఉత్తర ద్వారంలో ఉన్న ఉమా మహేశ్వరుడిని దర్శించుకొని ఆ తరువాతే మల్లన్నని పూజించాడట.  అటువంటి స్వామికి అభిషేకం చేసుకొని సలేస్వరం బయలుదేరాం.  సలేశ్వరం అడవుల్లో వెలసిన లింగమయ్య ఏటా చైత్రపౌర్ణమికి మాత్రమే దర్శనమిస్తాడు. ఈ ఏడు మమ్మల్ని కూడా పిలిచాడు. పౌర్ణమి వెలుగులో 6 మైళ్ళు అడవిలో కొండలు ఎక్కీదిగీ ఆయనపై మాకున్న ప్రేమని చూపిస్తే, పరమ సంతోషంతో బదులుగా తన దివ్యదర్శనం ప్రసాదించాడు.  అక్కడ నుంచి శ్రీశైలం వెళ్ళే త్రోవలో బుగ్గ మల్లన్న దర్శనం ఇంకొక అనిర్వచనీయ అనుభూతి.  ఆ తరువాత మల్లికార్జునుని, భ్రమరాంబికా దేవిని...

శివునికి మనమీద ప్రేమ ఎలాగూ ఉంటుంది.  తండ్రి తన బిడ్డలపై ప్రేమ చూపించడం చిత్రమేమీ కాదుగా.. మరి ఆ తండ్రిపై పిల్లలు కూడా తిరిగి ప్రేమ చూపిస్తే, మనకే కాదు, ఆ దేవదేవునికి కూడా అపరిమిత ఆనందమే.  ఇష్టపడితే 15km కొండల్లో ఎక్కిదిగి, విశ్వేశ్వరుని దర్శించుకు రావడం, అంత పెద్ద కష్టమేమీకాదు, అని ఇంకోసారి ఋజువయ్యింది. "నాకోసం ఇంత దూరం వచ్చారా నాయనలారా" అని శివుడు ఆనందించినట్లు అనిపించింది.  మాతోపాటు, మా అమ్మాయి కూడా హాయిగా అంత దూరం వచ్చేసింది.  పాండవులు అరణ్యవాసం చేసిన ప్రదేశంలో వెలిసిన శివాలయాలు అవి.  అనుభవించితే కానీ అందని అమితానందాన్ని గుండెలనిండా నింపుకొని తిరిగి వచ్చాం.   స్థల పురాణం చదువుకొని తరించండి. Temples visited: కొరసవాడ - సోమేశ్వరుడు - 9AM  పాతపట్నం - నీలమణి దుర్గ అమ్మవారు - 10AM పాతపట్నం - కేదారేశ్వరుడు మరియు నీలకంఠేశ్వరుడు - 10:30AM మహేంద్రగిరి - గోకర్నేశ్వరుడు (కుంతి నిర్మించిన ఆలయం) మరియు యుధిష్టరుడు ప్రతిష్టించిన ఆలయం - 5PM

ఇంకోసారి శివకరుణతో అద్భుత శివదర్శనాలు జరిగాయి. యనమదుర్రు శివాలయం ఎంతో విశిష్టమైనది.  శివుడు శీర్షాసనంలో తపస్సు చేస్తూ ఉంటే అమ్మవారు  సుబ్రహ్మణ్యుని ఒళ్ళో పడుకోపెట్టుకుని ఉంటుంది.  అతి ప్రాచీన చరిత్రగల క్షేత్రమిది. ఇంకొక విశేషమైన ఉమా రామ లింగేశ్వర స్వామి ఆలయం, గొల్లప్రోలు దగ్గర  దుర్గాడ అనే ఊరిలో ఉంది. లింగం పైన ఒక రాయి ఉండటం విశేషం. ఇది పంచాయతన శివాలయం.  Temples visited: యనమదుర్రు - శక్తీశ్వర స్వామి - 10AM  భీమవరం - సోమేశ్వర స్వామి - 10:30AM పాలకొల్లు - క్షీరా రామ లింగేశ్వర స్వామి - 11:30AM అయినవిల్లి - సిద్ధి విఘ్నేశ్వర స్వామి - 1PM దుర్గాడ - ఉమా రామ లింగేశ్వర స్వామి - 4PM పిఠాపురం - కుక్కుటేశ్వర స్వామి, పురుహూతికా శక్తి పీఠం - 5PM