శివ సంకల్పమస్తు

ముక్కంటిని దర్శించుకోవడానికి ఆయనకు ఇష్టమైన శివరాత్రి పర్వదినం కంటే మంచిరోజు దొరుకుతుందా? అయ్యోరిని చూడటానికి రెండు కన్నులు చాలలేదు, అభిషేకానికి బిందెడు నీరు సరిపోలేదు, తల ఆనించి తాకుతూ ఉంటే సమయం తెలియలేదు, చేతులారా స్పృశిస్తూ ఉంటే గుండె గెంతులు ఆపడంలేదు, శివుని పక్కనే కూర్చొని కబుర్లాడాలని ఉన్నా మాటలు రావడం లేదు. ఆనందం నిండిన అచేతన స్థితి - ఎంత పరవశం, అంతా శివ సంకల్పం. గుండ్ల బ్రహ్మీశ్వరంలో వెలసిన శివుడిని దర్శించాలని వెళ్లిన మాకు, నిరాశ ఎదురైంది.  నల్లమల అడవుల్లోకి అనుమతి దొరకలేదు.  వెంటనే సత్తువ తెచ్చుకొని అప్పటికప్పుడు వేరొక ప్రణాళిక ఆలోచించుకొన్నాం.  మోక్షగుండంలో వెలసిన ముక్తీశ్వర స్వామితో మొదలుపెట్టి,  నవనందులను దర్శించుకొని తరించిపోయాం. రుద్రకోటిలో ఉన్న రుద్రాణీ సమేత రుద్రకోటేశ్వర స్వామి తొలి అభిషేకం చేసే మహద్భాగ్యాన్ని ప్రసాదించాడు. కృష్ణా తుంగభద్రా సంగమంలో ధర్మరాజు కోరికమేరకు చెట్టు మాను లింగమై వెలసిన సంగమేశ్వరుడు కూడా స్పర్శ దర్శనంతో తరించమని ఆశీర్వదించాడు.  అలంపురం లో బాల బ్రహ్మీశ్వర స్వామి ఆవు కాలిగిట్ట రూపంలో ఉన్నాడన...

ఇంటికి దగ్గరలో ఇంత అద్భుతమైన శివాలయం ఉందని ఇన్నాళ్లూ తెలియలేదు.  ఇంత ఆలస్యమైనందుకు కించిత్తు బాధగా అనిపించినా, వెళ్లి దర్శనం చేసుకోగానే మా అదృష్టానికి పొంగింపోయాం.  నారాయణేశ్వర స్వామి - ఆ పేరులోనే దివ్య మహత్తు ఉంది కదూ...  వినడానికి, ఉచ్ఛరించడానికి ఎంత బాగుందో.   శివస్య హృదయం విష్ణు : - అన్న మంత్రం చదివినట్టే ఉంది. పచ్చటి కొండల్లో వెలసిన శివుడు రమ్మని పిలిచినట్టు , అప్పటికప్పుడు బయలుదేరి వెళ్లివచ్చాం.  మేము ఇంతవరకూ చూసిన శివ లింగాలలో ఇదే అతి చిన్న శివ లింగం.   బుజ్జి శివుడు అని పిలుచుకొని మురిసిపోయాం.   శివరాత్రికి  చక్కటి ఏర్పాట్లు  జరుగుతున్నాయి.  వీలైతే.. కాదు కాదు.. వీలు చేసుకొని, ముక్కంటిని చూసి తరించండి. Places visited: నారాయణేశ్వర స్వామి - గుడిలోవ, ఆనందపురం - 19th Feb 10:30AM శివ సన్నిధి లో   

అంతకన్నా భాగ్యం ఇంకేముంది? ఇంత అద్భుత దర్శనాలు ప్రసాదిస్తారు. తనివితీరా చూసి తరించడమే. ఒకే పానుమట్టం మీద ఐదు శివలింగాలు - ఇంకెక్కడా అగుపించని అద్భుతం ఖండ్యాం గ్రామంలో ఆవిష్క్రతమైంది.  బలరాముడు ప్రతిష్టించిన ఈ విశ్వేశ్వరుడిని చూసి తరించాం. ఆదిత్య, గౌరి, విష్ణు, వినాయక, మహేశ్వర లింగాలకు జలాభిషేకంతో మురిసిపోయాం. తిరుగు ప్రయాణంలో త్రోవ మారిస్తే, రామాలయం అగుపించింది.  గుళ్ళసీతారాంపురం గ్రామంలో స్వయంభూ గా వెలసిన సీతారాములు ఎంతో అందమైన మందహాసంతో పలుకరించారు.  మరెక్కడా లేని విధంగా రాముడు ధనుర్బాణాలు విసర్జించి, సీతమ్మవారితో సహా ఏకాంతవాసం చేస్తున్నాడిక్కడ.  లక్ష్మణస్వామి, హనుమలు కాకుండా సీతారాములు మాత్రమే వెలిసిన అరుదైన క్షేత్రమిది. Temples visited on 5th Feb: కాశీ విశ్వేశ్వరుడు - ఖండ్యాం, పొందూరు దగ్గర - 8AM సీతారాములు - గుళ్లసీతారాంపురం, రాజాం దగ్గర - 11AM అందమైన ఆలయంలో ఒక అందమైన జ్ఞాపకం